Poslije velikih napora, ali i sjajnih partija na nedavno završenom Mundijalu, gdje je sa reprezentacijom Argentine stigao do finala, 39-godišnji Leo Mesi nije imao dug ljetnji odmor.
Samo dvije nedjelje poslije tog finala u kom je Argentina poražena od Španije sa 1:0, Mesi je prošle noći nastupio u dresu Inter Majamija i započeo još jednu sezonu u američkoj MLS ligi.
Inter Majami je na svom terenu dočekao ekipu Kolumbus Krua i remizirao rezultatom 2:2, a Mesi je priliku da zaigra dobio od 53. minuta, kada je zamijenio Pintera pri rezultatu 2:1 za njegov tim.
Do tog vođstva Inter Majami je stigao u prvom poluvremenu, golovima Luisa Suareza, koji je u 16. minutu sa oko 40 metara lobovao protivničkog golmana, i Alena u 45. minutu, a na asistenciju Suareza koji poput Mesija blista i u 39. godini.
Prvi gol za goste bio je zapravo autogol brazilskog reprezentativca Kazemira koji je nedavno pojačao Inter Majami. On je u 34. minutu najprije poslao loptu u noge protivničkom igraču, a zatim je u pokušaju da otkloni opasnost prevario svog golmana.
Mesijev ulazak u nastavku nije pomogao domaćem timu da sačuva prednost, jer je Mendes u 84. minutu postavio konačnih 2:2.