Predsjednik DNP-a Milan Knežević dostavio je medijima pismo podrške naslovljeno "Ruzmarin za brata", koje je uputio bivšem predsjedniku Srbije i nosiocu liste Jedinstvena Srbija Aleksandru Vučiću .
U pismu "bratu Aleksandru", Knežević navodi da se u " nedjelju se ponovo piše istorija našeg naroda".
"Takav nam je nacionalni kod, otkad znam za sebe stalno ispisujemo istoriju i branimo sjećanje na ono zbog čega treba živjeti i za šta se vrijedi boriti. A u stvari, sve je Njegoš rekao prije nas: “Neka bude borba neprestana, neka bude što biti ni može.” A tebi ga je šorak donio da pronosiš ovu borbu i prolaziš kroz ofanzive otkad svane do kad mrkne, jer Srbija je velika tajna", napisao je Knežević .
Naveo je da je Vučić svoje stranice istorije već napisao, i to ne rukom, već životom i djelima.
"Zato i nema razloga da brineš za rezultat ni na jednom biračkom mjestu, jer glasački kuponi ne važe u vječnosti. Što su te više izdavali, skrivali se iza tebe, bježali od samih sebe, zaboravljali što bi trebalo da pamte, a pamtili samo mape sopstvenih interesa, ti si bio sve jači, postojaniji i dostojanstveniji, ne udjeljujući im čak ni prezir", piše lider DNP-a.
Dodaje da su neki kojima je valjao "više nego rođenoj djeci i porodici, na prvi prasak petarde i blokadu pješačkog prelaza, izračunali da treba da promijene stranu, ili bolje reći da našteluju južne djelove leđa, pošto im je obraz, što bi rekao Duško Dugouško:” skrenuo lijevo kod Albukerkija.”
Knežević bratu Vučiću, između ostalog, poručuje da bude ponosan na sve što je postigao.
"A svima onima koji misle da ja sve ovo moram da pišem, jer nešto od tebe očekujem, želim da poručim da su u pravu. Očekujem da pobijediš, ništa mi drugo ne treba”", napisao je Knežević.